اخر قصيده للشهيد الشاعر رحيم المالكي في يوم استشهاده

هذه القصيده الاخيره التي القاها الشاعرالشهيد المرحوم ( رحيم المالكي) في اليوم الذي استشهد فيه لذلك احببت ان اضعها بين ايديكم


كان كلامه رحمه الله قبل القاء القصيده الاتي :-
بعد ما عجزنا من مخاطبة الشرفاء لحل ما يدور في العراق اظطررنا لمخاطبة غير الشرفاء
القصيده بعنوان


رساله الى الدكتوره حسنه ملص

ياهو المنج اشرف خاطر اشكيله
دليني يحسنه وباجر امشيله
امشيله واسولف كل حجي المظموم
كبل حفاي كالو هسه ماكو هدوم
بيت من القنابل والقصف مهدوم
وحكومه بلا حكومه بغير تشكيله
تنازع عل كراسي والشعب حفاي
وابشرج لا غذا لا كهربا لا ماي
احنه اهل النفط والكاك عد زلماي ( زلماي خليل زاده السفير الامريكي )
يا حسنه الحكومه تكدر تشيله ؟

---------------------------------

حكومتنه الرشيده ليش هالتاجيل
مو مطرت علينه من السما سجّيل
بلوه احنه ابتلينه قابل اهل الفيل
مو هذا ابرهه خلو يرد فيله
جوّعنه ابرهه والجوع ابو الكفار
ثلث اسنين اسمع ما اشوف اعمار
بس بعض الحكومه اصبحت تجار
بهاي اشهد يا حسنه بيوم وبليله
تجار الحكومه والشعب حمّال
وياهو اليجي باجر اويغير الحال
من هاي السوالف حملينه اجمال
اذا ينعدل وضعي ينعدل ذيله
حكومتنه الرشيده ليش هذا البوك
تره لهذا الشعب قط ما تضيع حكوك
باجر بانتفاضه نشك جثير حلوك
عرفنه الباكنه ونعرف اليوميله