صــــــــــــــوجك يا وطـــــــــــــــن
تتبادر الئ ذهني قضايه وتحيرني القواعد وابقه ساكن
وتراودني حالة فعل مكسور ويبين وضعنه البعده راهن
بئسم الكركري العقلائي مسحور وبحكم الكذائيات صافن
حبيبي الصوج من ابعيد ينشاف واضح حتئ من ابعيد باين
ديمقراطي قتل الناس ياناس والارهاب البغداد ساخن
محد خله حد للي يذبحون وكدر يقضي عله بازار الرهائن
ومحد دكله دكه الترفع الراس و ولا واحد كدر يحمي المواطن
جذابين كلمن كاعد ابراك وعلئ التفجير والقتله يراهن
والماخذ وظيفه ومنصب جبير تلكا ملتهي وشغله يلاسن
سياسيين صارو كلش اكبار او وزارات واقل رتبه سياسيه معاون
كلها تريد تلغف من ابو الخيراو بالبوك اصبحوا جنهم مكاين
واذا تحجي يكللك انه مشغول اخذت افلوس اريد ابني مساكن
صح انه بعيد وهاي اسرار- وصح بالكهربا ما اعرف اشصار
وصدك عالغاز مافديوم محتار ماعشت القهر هذا ولكن
تلفزيون عندي بسوك الاخبار شفت الحرب حتئ اعله الدواجن
مستيقظ ولكن دمي موجور والليل اليمر بالديره داكن
اكثر مابحيلي شويه ابيات –غثيثات ويضرن بعض مرات
مثل المرض ما اعرف دواهن
محتار وجثيره هوايه الاسباب-مره بنار كبره وجمري عطاب
ومره تشوفني بوسط الجنائن
اشرد من سكوتي بعذر مخنوك اشوفن ماتكفيني الاماكن
اعاين ظاهر الاحداث وهواي ميخليني عالاوضاع اعاين
سد بوجهي بيبان العلاقات-ويكلي رواياتك خرافات
نساني الكلي ما انساك هيهات وذيج ايامنه الحلوه نساهن
كتله انتظر خل اشرحلك اشصار بعد ماضل وجهه ظاهر وباطن
حرامي النفط عاف الكاك مفتوح والكاروبه تكرف بالمعادن
وليل القتل يكتل والحكومات حب الكرسي والمنصب عماهن
ورد الامر بيدين السلابات والمخلص رجع ينعت خائن
ومن تلزم خبيث يكول مظبوط انه الجنت اذبح بالمدائن
وانه اللي جنت عالدرب سلاب وانه اللي جنت الزم رهائن
بالله عليك هم اتشوفهم ناس هذوله اللي يطيعون ابن لادن
اذا للذيل وصلت جيفت الراس والضاري فتاويه فتاهن
واكو هوايه بشر تنتظر فرهود والفوضه عله بيبان المخازن
متكلي بعد شتفيد الاوضاع والوادم صفو كتلة ضغائن
حاولت افتهم سر هاي الافعال والاخلاق منهو اللي لغاهن
رحت ابعيد افكر واسال الروح مشاكل هالوكت ياهو وراهن
شفت العله من كل هاي الافعال صوج الوطن مو صوج المواطن
الشاعر الكبير الحسيني, فاضل مظفر
موضوع: صــــــــــــــوجك يا وطـــــــــــــــن 
الجمعة أغسطس 31, 2007 4:03 pm
