حرت اوصفك بستان لو واحه عشك خضره
حرت اوصفك نخله من العسل ,وكل الحلا يتغزل بتمره
حمامه انت من بين الطيور انت من بين العشب زهره
يا خيمتنا يا ذروة الصيف يا شامخه وعاليه يالشجره
انت يا شمسنا يالحروفك ابكل الكلوب مغروس بذره
انت بكل شريان يجري , ومن دمنا ينبع ويرتوي جذره
حرت اوصك يالحسنك يلوع الروح ويحركه بجمره
اتنهد الشوفتك وكلي شوك, مذبوح يا حسرتي الحسره
مخنوك وجوايا عصور من الحزن , موجوع وبصدري عبره
تاه مني الفكر وخانت بيه الحروف وصرت اتخطى اثره
حرت اوصفك يا ليلي انت ونهاري انت كمر للسما وانت بدره
انت يا طيبة هلي عزيزه والغالي والله صعب هجره
لا وحك رب الكون وحك جبل كردستان وحك نخلة البصره
طبع بينا المحنه واحنا الوفا هنا ربينا وبعروكنا يجري نهره
ومو احنا اهل الغدر ودمنا عراقي وما يصير ماي عمره
عراقي ومتعلم ,يصبر وما ينحني وبجفوفه يحفر الصخره
جزه العمر يوم وبعد يوم وخطار الفرح مر بينا مره
بغداد صبرك يا سلوتنا والفجر طالع بقوة الله وبامره
انت ديوان العرب من زاخو للفاو الشط العرب جسره
بغداد هذا الي بصدري والقلم يكتب الج وما نشف حبره
موضوع: حرت اوصفك 
الثلاثاء أكتوبر 16, 2007 4:19 am
