( ماكو بحالاتك !!!!!!!!!)
عجائب الدنيه سبعه وانته الثامن
لاتبعد عليه وانه كلي وياك
واذا رايد تروح اشيبقى من عندي
جنت الوحدي ماهوه انته وياي
هسه وياي كلك انه مو وحدي
صارحني بكلامك حته اعرف البيك
ونته بكيفك احجي امنين ماتبدي
رايد كلمه منك خايب انته اشبيك
وانه اباب حلكك كاعد امجدي
ماتعرف تجامل بس تضوج الناس
ماترهم عليك ابمنطقك حدي
عليه امفصل انته اشلون افرط بيك
ماترهم لغيري امفصل ابكدي
سولفلي اعله كيفك حته ادوخن بيك
عسل كلك عسل عالوادم اتبدي
تشبه للشمس بس انته احله اهواي
من تطلع تأشر للشمس ردي
مو نظرات عندك من تصد قناص
وتصور بعد من تنطلق ضدي
عينك ليل مظلم والرمش جتال
وخدك مثل شفتك شفتك وردي
جمالك مو طبيعي اشلون اوصف بيك
ياطبع الورد يالكلك اعجوبه
صح سبعه العجايب ونته ثامن ليش
انته اول عليهن واجمل اعجوبه
حس بيه اعله بختك مره يبن الناس
احس روحي اعله روحك خشبه مصلوبه
صوتك من يمر ياخذني هيج وهيج
وحس الدنيه جنهه ابعيني مكلوبه
من شفتك لهسه ابروحي اهيس النار
تحركني وابد ماصيحن التوبه
ماتحجي وي غيري ونته بس وياي
وعشرتك بس عليه اصبابه مصبوبه
لحظه المااشوفك كلشي عندي ايضيع
ومن من عمري هاي اللحظه محسوبه
مانامن بعد خليني اباوع بيك
عيوني الشوفتك جم عام مطلوبه
0000000000000000000 0000000000000000
م ن ق و ل
موضوع: ( ماكو بحلاتك !!!!!!!!!) 
الإثنين أكتوبر 22, 2007 1:19 am
