اسكتي
اسكتي بعد ياروحي اسكتي- ورده بنص جمر خلاني وكتي
-----------------------
ورده بنص جمر حطني زماني- انه الجنت اكول انه الفلاني
اجيت الوي الوكت هو لواني- يمكن هذا حضي وهذا بختي
ورده بنص جمر خلاني وكتي
---------------------------
بطلي النوح ياروحي وهجعي-ومن الحزن والاهات اطلعي
خليني اشوفن شنهو وضعي-وين انه ووين انتي طفرتي
ورده بنص جمر خلاني وكتي
------------------------------
انه الجنت بالبستان ورده-ويودني الربيع اللي اوده
الواني زهيه وطيبي بعده-وبحلك الحبايب حلوه قصتي
ورده بنص جمر خلاني وكتي
---------------------------
ماجنت اعتقد تلفيني صدمه-جنت ادري الورد للناس رحمه
ما ادري الوكت حاسبني فحمه-والموكد يصيح وين جنتي
ورده بنص جمر خلاني وكتي
------------------------------
اسكتي يصيح ميخليني احجي-ومامسموح من القهر ابجي
كضيت العمر ياناس هجي-مالومه فكدت ثلثين صحتي
ورده بنص جمر خلاني وكتي
----------------------------
ورده وماحويت بعودي سله-ومافديوم بانت عندي خله
ملت ورد انه وخوش مله-والبستان يعرف طيب ملتي
ورده بنص جمر خلاني وكتي
------------------------
مامره جزعت لو نفذ صبري- اعرف انه ورده وشنهو قدري
لكن خلص بالاهات عمري-وتفرط ورك جنبذ وردتي
ورده بص جمر خلاني وكتي
----------------------------
اعتب عالوضع من طيب ذاتي-واشكي همومي للي من حلاتي
غش ودغش ذني مو ملاتي-ليش النار من هالوكت حصتي
ورده بنص جمر خلاني وكتي
--------------------------
ورده بنص جمر روحي الحزينه-وبنار الهجر صارت رهينه
اسهر ليلي كل يوم بمدينه-محد كدر يعرف شنهو علتي
ورده بنص جمر خلاني وكتي
--------------------------
ورده بنص جمر روحي تركتها-وبجف المصايب ودعتها
ما ادري شجاني وفاركتها-وسكنت الغرب وحدي بغرفتي
ورده بنص جمر خلاني وكتي
الشاعر الكبير الحسيني, فاضل مظفر
تحياتي لكم جميعا
موضوع: الشعر الحر اسكتي 
الجمعة أغسطس 31, 2007 3:58 am
